اكزيما ربات المنازل

اكزيما ربات المنازل، انا ما احب هذا المسمى لان اعتقد ان يحصر دور المرأة شوي و لكن هذا الاسم المتداول. افضل اسميها اكزيما تلامسية

هذه المشكل تصيب اي شخص يضع مواد حمضية او قلوية على يده مثل صابون المواعين على سبيل المثال

هذا الصابون قلوي و فيه مواد مصنوعة لازالة الدهود من المواعين و الجدور و بالتالي اذا استخدمناه على جلدنا راح يذوب الدهون الطبيعية اللي موجودة على سطح جلدنا و ايضا يحطم خلايا الجلد. هذا راح يسببلنا اكزيما على ايدنا مثل اللي بالصورة فوق

الحين راح اقولكم الوقاية و العلاج

اول شي ضروري ان لمن تغسلون المواعين تلبسون القفازات المخصصة لغسل المواعين و افضل نوعية من هذه القفازات اهي اللي فيها طبقة قطن داخلية و هذا لسببين

السبب الاول هو لان في ناس اساسا عندهم حساسية من القفازات المطاطية اللي نستخدمهم لغسل المواعين و هذا يعني اذا لبسناهم حتى من غير ما نغسل مواعين راح يلتهب جلدنا. طبقة القطن تعمل ك عازل ما بين المطاط و الجلد

السبب الثاني هو لان اذا غسلنا المواعين بقفازات المطاط اللي ما فيها طبقة القطن الداخلية راح تتيمع رطوبة داخل الدس و هذا ممكن يزيد الطين بلة

قبل ما تغسلون المواعين حاولو تحطون طبقة خفيفة من الفازلين عشان ايضا تكون طبقة عازلة للجلد

تطبيق الخطوات اللي فوق كفاية على الحالات الخفيفة اما الحالات الشديدة تحتاج الى كريمات الكورتيزون بوصفة من الطبيب لفترة قصيرة. منتجات مثل كريم او مرهم الديرموفيت او الاليكا لفترة اسبوعين كحد اقصى